အင်တာဗျူးသွားဖြေရင် ဘယ်လိုဝတ်သွားမလဲ
ပင်ကိုအရည်အချင်းတွေ၊ စရိုက်တွေကသာ အင်တာဗျူးအတွက် အရေးကြီးတဲ့ အချက်တွေလို့ လူအများစုက ထင်ကြပါတယ်။ ဒါပေမယ့် သင်ဝတ်သွားမယ့် အ၀တ်အစား အသုံးအဆောင်တွေကလည်း အများကြီးအရေးပါ ပါတယ်။ အ၀တ်အစားကို မှန်မှန်ကန်ကန် ၀တ်ဆင်ပြီးသွားရင် သင့်အတွက် အခွင့်အလမ်းတွေ ပိုရနိုင်ပါတယ်။ အင်တာဗျူးကိုသွားဖို့ ပြင်ဆင်တော့မယ်ဆိုရင် သတိပြုရမယ့် အရေးကြီးဆုံး အကြံပြုချက် (၄)ချက်ကို ဖော်ပြလိုက်ပါတယ်။
အမွှေးနံ့သာ
အင်တာဗျူး ဖြေမယ့်နေ့မှာ အ၀တ်အစား မ၀တ်ခင်ကတည်းက ရှောင်ရှားရမယ့် အချက်တစ်ချက်ရှိပါတယ်။ ရေးချိုးပြီးချိန်မှာ သင့်ရဲ့ လုပ်ရိုးလုပ်စဉ်တစ်ခုဖြစ်တဲ့ မုတ်ဆိတ်ရိတ်ပြီးရင်သုံးတဲ့ ရေမွှေးသုံးတာ၊ ဒါမှမဟုတ် သင်အကြိုက်ဆုံး ရေမွှေးတစ်ခုခု ဆွတ်တာ စတာတွေလုပ်ဖို့ သင့်စိတ်ရောက်သွားပါလိမ့်မယ်။ အင်တာဗျူးမယ့် သူကို စိတ်အနှောင့်အယှက်မဖြစ်စေချင်ရင်တော့ အင်တာဗျူးရှိတဲ့ နေ့မှာ ဒါတွေမလုပ်ပါနဲ့။ သင်နှစ်သက်တဲ့ အမွှေးရနံ့ကို သူတို့က ကြိုက်ချင်မှ ကြိုက်မယ်လေ။
ဘာဝတ်မလဲ
ဘဏ်လုပ်ငန်းတွေ၊ ဥပဒေဆိုင်ရာလုပ်ငန်းတွေ၊ အကျိုးဆောင် ကုမ္ပဏီတွေ စတဲ့ သမားရိုးကျ ကုမ္ပဏီတွေကို သွားမယ်ဆိုရင် ကုတ်အင်္ကျီနဲ့ နက်ခ်တိုင်ဝတ်သွားဖို့ လိုပါတယ်။ ကုတ်အင်္ကျီအရောင်ကို အနက်၊ မီးခိုးရောင်ရင့်ရင့်နဲ့ အပြာရင့်ရောင်တွေထဲက ရွေးပါ။ ပြီးတော့ စည်းကြိုးပါတဲ့ ရှူးဖိနပ်အနက်ရောင်၊ ခါးပတ် အနက်တို့နဲ့ တွဲဖက်လိုက်ပါ။ ဘယ်ကုတ်အင်္ကျီ အရောင်နဲ့မဆို၊ ဘယ်အသားရောင်နဲ့မဆို လိုက်ဖက်တဲ့ အပြာရောင် ရှပ်အင်္ကျီတွေကတော့ အကောင်းဆုံးပါပဲ။ ရွေးထားတဲ့ ကုတ်အင်္ကျီ၊ ရှပ်တို့နဲ့ အလိုက်ဖက်ဆုံး နက်ခ်တိုင်ကို စည်းပါ။
ဆော့ဖ်ဝဲထုတ်လုပ်တဲ့ ကုမ္ပဏီ၊ နည်းပညာဆိုင်ရာ ကုမ္ပဏီ၊ ကွန်ပျူတာလုပ်ငန်း စတဲ့ ခေတ်မီတဲ့ ကုမ္ပဏီတွေရဲ့ အင်တာဗျူးဆိုရင်တော့ ကုတ်တွေ၊ နက်ခ်တိုင်တွေ မလိုအပ်ပါဘူး။ ဘယ်လိုပဲဖြစ်ဖြစ် သူတို့ရုံးထဲကသူတွေ ၀တ်ထားတာထက် အနည်းငယ်ပိုကြည့်ကောင်းတာ ၀တ်သွားရင် ပိုကောင်းတာပေါ့။ ဒါ့ကြောင့် ပွဲနေပွဲထိုင်ဝတ်လို့ရတဲ့ ၀တ်စုံကို ရွေးချယ်ဝတ်ဆင်ပါ။ ဒါပေမယ့် ပေါ့ပေါ့ပါးပါးတော့ ဖြစ်ပါစေ။ ဒီလိုဝတ်စုံမျိုးကို ဥပမာပေးရရင် ကာကီရောင်ဘောင်းဘီရှည်၊ ကော်လာနဲ့အင်္ကျီကိုတွဲတဲ့ကြယ်သီးပါတဲ့ ရှပ်အင်္ကျီ ပြီးတော့။ ဒါပေါ့…..ကြည့်ကောင်းတဲ့ ရှူးဖိနပ်တစ်ရံနဲ့ လိုက်ဖက်ညီတဲ့ ခါးပတ်တို့လည်း ကျန်လို့ ဘယ်ဖြစ်မလဲ။ ဘလေဇာအင်္ကျီ ၀တ်ချင်လည်း ၀တ်နိုင်ပါတယ်။ အပြာရင့်ရင့် ဘလေဇာအင်္ကျီက ကာကီရောင်ဘောင်းဘီရှည်နဲ့ လိုက်ဖက်ညီပါတယ်။
ဖိနပ်နဲ့ ခါးပတ်
ရှူးဖိနပ်အရောင်နဲ့ ခါးပတ်ကို လိုက်ဖက်ညီအောင် ဂရုပြုပါ။ ၀တ်စုံဟာ အညို၊ အနက်၊ အပြာရင့်၊ မီးခိုးရောင် အရင့်တို့ဆိုရင် ရှူးကို အနက်ရောင်ရွေးပါ။ ၀တ်စုံရဲ့ အရောင်က မနုလွန်း၊ မရင့်လွန်းရင်တော့ အညိုရောင် ရှူးဖိနပ်ကို ရွေးချယ်ပါ။ (သင့်မိခင်ရဲ့လေသံအတိုင်း ပြောတာတော့ မဟုတ်ပါဘူး) အင်တာဗျူး မသွားခင် ရှူးဖိနပ်ကိုတော့ ပြောင်လက်အောင် တိုက်ချွတ်ဖို့ မမေ့ပါနဲ့။ ရှူးဖိနပ်ပေါ်မှာ ပွန်းရာ၊ ခြစ်ရာတွေရှိရင် သင့်သွင်ပြင်ကို စုတ်ပြတ်စေလို့ပါ။
တွဲဖက်စရာများ
အင်တာဗျူးကို ယူဆောင်သွားမယ့်အရာတွေဟာ ပညာသားပါပါနဲ့ နည်းနိုင်သမျှနည်းပါစေ။ သင့်ရဲ့ ပညာအရည်အချင်းမှတ်တမ်း၊ ထောက်ခံစာ စတာတွေကို သယ်ဖို့ စာရွက်စာတမ်းထည့်တဲ့အိတ် ဒါမှမဟုတ် ဖိုင်တွဲတစ်ခုသုံးပါ။ နားတောင်း၊ လည်ဆွဲ၊ နှာခေါင်းမှာ ကွင်းတပ်တာတွေက အလုပ်တကယ်လိုချင်သူအတွက် အင်တာဗျူးကို ဆင်မြန်းသွားသင့်တဲ့ အရာတွေမဟုတ်ပါဘူး။ ဘယ်ကုမ္ပဏီကိုပဲ သွားသွား ယောက်ျားလေးမှန်ရင် လက်ဝတ်ရတနာတွေကို နည်းနိုင်သမျှ နည်းနည်းသာ ၀တ်သွားသင့်ပါတယ်။
0 Responses to "How to Wear to Interview"
Post a Comment